E latalata i le iva tausaga o tau fuafua le faatinoina o le galuega o le fausiaina o le hall a le ekalesia EFKS i Manurewa a le susuga i le toeaina ia Rev Talia Tapaleao ma le faletua ia Feiloaiga Tapaleao faapea le ekalesia.
O le tele o feutana’iga ma auala sa tuuina mai e le Council na afua ai ona tuai ona faagasolo le galuega.
Na sosoo ai ma le faama’i o le Covid i lea taimi ma ua atili ai lava ona tuai ona amata le galuega.
E ui i le tele o feutana’iga ma le gaogaosā sa uia e le ekalesia i le taumafaiga o le galuega ae sa mau pea le toovae ma onosa’i i auala e tatau ona faatino a o le’i amataina le galuega.
O le faai’uga o le tausaga ua mavae na faamautū ai mea uma o le galuega se’ia oo mai i le amataga o le tausaga lenei 2024 ma amata aloa’ia loa le fausiaina o le hall e le konekarate a le Southpaw Construction.
E ono masina na ofoina mai e le konekarate latou te fausia ai le galuega ma o se faamāmā avega lea mo le ekalesia.
E 3.4 miliona le seleni a le ekalesia na tapenaina auā lenei galuega, peitai e mae’a le fausiaina o le hall e le’i mae’a ona faaaogā le tupe na tuuina mai e le faletupe.
Ma o se fiafiaga sili lea i le ekalesia ona ua mae’a lelei le galuega ae o loo totoe pea le tupe.
O le hall na fausiaina ona o le tofa mamao o le susuga i le faafeagaiga ma le paia o le ekalesia auā le lumana’i manuia o le galuega a le Atua, ae lē gata i lea, o le tele o polokalame faatino a le ekalesia i tausaga ta’itasi, ae o loo mautū ma telē se fale e faatinoina ai ana polokalame.
E faatino le fausiaina o le hall ae maua ai ma le avanoa e toe faafou ai ma le malumalu tapua’i auā le atolaau a le Atua.
O le faamoemoe ua taunuu o le laau lea o le ola, o le viiga lea i le Atua na patipatia e le Ekalesia EFKS Manurewa ina ua taunuu ma le manuia le galuega sa gapatia ai matāfale e 78 o le aulotu.
E mae’a le galuega o loo totoe le seleni o le galuega e le’i uma ona faaaogā i le fausiaina o le hall ma le toe faaleleia o nisi o vaega o le malumalu.
