O se tama a’oga ua oo lona olaga a’oa’oina i le vasega Tausaga 13 i se kolisi maualuga i Samoa, ua lavea’ina mai le nofosala i le falepuipui ona o le itiiti o ona tausaga, i le ma le isi itu tāua, o le tuta’ia o lona olaga a’oa’oina pe a alu i le falepuipui.
Ua tapu e le faamasinoga ona faailoa suafa o lē ua molia ma se teineititi 15 tausaga na aafia i le solitulafono.
O lea tamaititi 18 tausaga le matua sa molia i le faia o se fesootaiga tau faiaiga ma se teineititi e i lalo o le 16 tausaga lona matua, ma moliaga e lua o le faia o se faaoolima matagā.
O lē na aafia e pei ona faailoa i le faaiuga tusitusia a le faamasinoga, sa malaga tafafao mai i Samoa ma ona mātua ma ni ona tuagane.
O se tasi o aso a o iai i lo tatou atunuu sa o ma nisi o le latou aumalaga ma tafafao i so latou aiga i se tasi o nuu ma feiloai ai ma ona tausoga.
Sa momoe ai i le po, ma o le avanoa lea na tupu ai ma le gaioiga solitulafono.
Na ioe lē ua molia i moliaga a leoleo ae na talosaga lana loia ina ia faapafala se faasalaga e aunoa ma le faamaonia o moliaga ona o lona matua, ma le telē o se afaina o lona olaga a’oa’oina pe afai ae ulufale i le falepuipui.
O le itu a leoleo sa finau mo se faasalaga i le toese ae peitai na suia lea finauga i se faasalaga i le falepuipui, ina ua toe iloilo e loia a leoleo vaega eseese o le moliaga, lea e lē o iai se mau a leoleo o ta’ua ai sa faatino se gaioiga na faamalosi ai e lē ua molia lē na aafia.
O loo faailoa foi i le faaiuga se faamatalaga a le tina o le teineititi na aafia sa ia ta’ua ai, e lē manao i se faasalaga i le falepuipui ae ia faia se a’oa’iga mo lē ua molia ina ia lē toe tupu mai i se isi teineititi lana gaioiga.
