O se tala ua faate’ia ai le faafofoga a le lalolagi atoa, ina ua faia se faasilasilaga faapitoa a le Purinisese o Uelese (Princess of Wales) i luga o le televise (Independent TV), ua ia faailoa faalauaitele mai ai lona aafia i le gasegase o le kanesa.
Faailoa e Princess Kate, o Ianuari o le tausaga lenei na faia ai sona taotoga i lona laualo (abdominal surgery) i se faaletonu sa lei iai se manatu o se aafiaga i le kanesa, peitai ane o nisi siaki ma suesuega na faia mulimuli ane na māua ai e fomai ua aafia le Purinisese i le kanesa.
I le faasilasilaga a le Purinisese o loo ta’ua ai o lea ua faatoa amata vaega o togafitiga o lona kanesa le “preventative chemotherapy”.
Ua 42 tausaga o le soifua o le tamaitai Purinisese, ma e ui o se tala ua matuā faate’ia ai o la aiga aemaise le lalolagi atoa, ae o loo la galulue faatasi ma lana tane, le Perenise o Uelese poo Prince William, ina ia faia mea uma e faagasolo lelei ai mea mo lo la aiga aemaise mo si a la fanau laiti o loo iai.
Na faamautinoa mai e Kate, o loo faasolosolo lelei lava lona malosi i lana faalogo i lona tino i aso taitasi aemaise e ui i le aafiaga ua iai, ae o loo taumafai e taula’i atu ma ave lana faamuamua i mea o le a fesoasoani ia te ia e toe faaatoatoa ai lona malosi, i lona mafaufau, lona tino ma le agaga.
Faaleo mai foi le faafetai a le tamaitai Purinisese i le atunuu atoa, o la aiga ma uo ma le loaloa o soo se tagata o loo molimoli atu alofaaga ma feau faamafanafana mo ia ma lona aiga talu mai ona iloa lenei aafiaga i lona gasegase.
Ua sau ai i tua lenei tala faanoanoa, ae faatoa mavae atu foi nai vaiaso e lei mamao tele atu talu ona faasilasila mai e lana Afioga i le Tupu o Peretania, King Charles III, lona aafia foi i se ituaiga o kanesa, ma o loo faagasolo foi i le taimi nei ona togafitiga.
