O le uluai saunoaga faamanuia o le tausaga fou mai le afioga i le Palemia o le Mālō o Samoa ia Fiame Naomi Mataafa ma ia toe asiasi ai i futia i le taimi o le faiga filifiliga a le atunuu ia Aperila o le tausaga na te’a nei ma ia faafetaia ai le Atua ona o le sa lē tuuaunoaina lona alofa ia Samoa ma maua ai le to’a filemu i le taunuu ai o le atunuu i le toe aso o le nā tausaga 2021 ae faafeiloai le tausaga 2022.

Na faamamafa foi e le tamaitai Palemia i

lana saunoaga faamanuia faigamalo temokarasi ma fesuiaiga o taitai ma faigamalo ona e tasi le auga ma le  faamoemoe ia atinae tagata ma le atunuu ia manuia ma ia tapu’e atili le soifua ma ola i le tulafono.

Taua e Fiame “Na amata le tatou folauga i le amataga o lenei tausaga i le faamalulu mai o

faigata o le faama’i oti o le Koviti19, o ia faigata ua aafia ai atinae au i luma a Mālō o le lalolagi ma soifuaga faaletagata soifua ona o galuega ma pisinisi ua faaletonu. Ona sosoo ai lea ma le faiga filifiliga a le atunuu ia Aperila ma e le’o toe pō pe lilo le mataupu na tulai mai. Na tauau ai ina numi le fau ma nunu le to’au i vaega faaupufai. Petai e ui i nei souā tatou te molimau faatasi e tumau pea le faamaoni ma le matagofie o le Atua i aso uma”.

Na ia saunoa foi “O’u te talitonu ana lē seanoa lana taitaiga mamana tatou te lē mafai ona aulia manuia mai i le faaiuga o lenei tausaga. Ia foi le viiga ma le faaneetaga i le Atua”.

O le tulai mai ai  o le faigamalo a le Faatuatua i le Atua Samoa ua Tasi o se suiga tele lea talu mai le 40 tausaga ua mavae i tulaga tau upufai o Mālō, o le faiga lea o malo temokarasi e fesuiai Mālō ma taitai e tofia mai e taitaia le atunuu mai lea taimi i lea taimi ae tasi lava le faamoemoe ia auauna mo le atunuu.

Na faafetaia ai foi e le Palemia aufaigaluega uma a le Mālō aemaise i latou o loo taimi ai puipuiga mai le faama’i o le koviti19 lea o loo mafatia ai le lalolagi atoa.