O le asō lea e amata ai le polokalame o le faaaliga pito telē a le Pasefika ma Maoli a aoga maualuluga ma kolisi i Aukilani, le ASB Polyfest, ma sa tapaina ai e le sui usufono o le fono faatonu o le taulaga o Aukilani ia tagata e lagolagoina lea faaaliga mata’ina.
O le faaaliga a le ASB Polyfest e faia i le malae a le Manukau Sport Bowl i Aukilani i Saute mai le Aso Lulu, 20 o Mati e oo i le Aso Toonai, 23 o Mati.
Ua iai le faamoemoega o i latou o faamaopoopoina lea faaaliga i se fuainumera maoa’e e valu afe o tamaiti aoga o le a faia a latou faaaliga o pese ma siva faaleaganuu.
O le sui usufono a Manukau, Alf Filipaina, ua ia faaalia, e tatau i tagata ona lagolago i lea faaaliga, ma auai i se faalogona matagofie.
E manatuaina e Filipaina le amataga o lea faaaliga i le 1976, ina ua amataina i le kolisi a le Hillary College, lea ua iloa nei i le
Sir Edmund Hillary Collegiate i Otara, e se kulupu o tamaiti ma ni faiaoga.
Sa amataina e ni aoga se fā, e pei ona sa naunau ai e fia faalauiloa lo latou mitamitaga ia latou tu ma aganuu ma faasinomaga.
Ae o le taimi nei ua olaola, e pei ona lipotia ai ua silia ma le 60 aoga.
Faaalia e Filipaina, sa avea ma vaega o le uluai Polyfest ina ua amataina lana taleni galue o se leoleo, ae o lea e faaauau ona auai ai o se sui usufono a le taulaga o Aukilani.
