O se auaunaga fesoasoani mo tagata lautele a le Ekalesia a Iesu Keriso o le Au Paia o Aso e Gata ai i le setete o Utah i Amerika, ua ofo latou te faatupe le fausia o se maota e avea ma nofoaga e faia ai sailiiliga faafomai mo fanau e sauaina o loo vaaia e le faalapotopotoga o le Toomaga mo ē Puapuagatia.
O se maota foi o le a faatino ai ma le galuega faufautua poo le counselling mo i latou e sauaina o loo i le vaaiga a lea faalapotopotoga tuma’oti.
O le vaiaso nei ua amata ai ona fausia lea nofoaga e sui o le auaunaga fesoasoani a le Ekalesia a Iesu Keriso o le Au Paia o Aso e Gata ai, sa malaga mai e faatino le latou fesoasoani.
O Novema o le tausaga ua mavae na faamautu ai lea agalelei ma faailoa ai e le ekalesia lo latou fia faia o le galuega e avea o se lagolago i le latou polokalame e ofoina mo tagata lautele.
E 6 i le 7 vaiaso o le a fausia ai le nofoaga ma a oo ina mae’a ma amata faaaogā, o le a lē toe tau aveina fanau sauaina e vaaia se fomai i le falemai, ae o le a avatu le fomai i le nofoaga fou e faatino ai lea galuega tāua mo fanau o loo i le vaaiga a le Toomaga i le nofoaga o le Campus of Hope i Tuanaimato.
