O le vaa fou ua mae’a fausia o le a sui a’i le vaa o le Lady Naomi, ua fesiligia nei pe aisea ua lē faaauau ai le igoa o le vaa ae ua faaigoa o le Lady Samoa IV.
O le tausaga e 2019 na uluai faailoa ai e le faalapotopotoga o vaa a Samoa tapenaga o se talosaga na ave i le Malo o Iapani mo le faatupeina o se vaa fou e sui ai le Lady Naomi, ma se isi vaa mo malaga i le va o Mulifanua ma Salelologa e sui a’i le vaa o le Samoa Express.
O faamaumauga o ia tapenaga o loo faaalia ai na mafua ona faia lea talosaga ona ua silia i le 20 tausaga o faaaogā le Lady Naomi o se isi foai a Iapani, ma o se tasi o vaa ua lē talafeagai lona malosi e faaauau ai ana malaga.
E 66 tesimale 7 miliona le tau o le vaa fou le Lady Samoa IV, o le a faia malaga i le va o Samoa ma Amerika Samoa. Ua faailoa e se molimau faatuatuaina na faaigoa le vaa a o lei see atu le pulegamalo fou ua iai nei.
