O le Aso Tofi o le vaiaso nei e afea ai le uafu tele i Apia e le meli la’upasese o le MSC Magnifica ma le pasese e 2,176 e aofia ai ma le to’avalu o tagatānuu poo sitiseni o Samoa.
O loo malaga mai ai ma le auvaa e 1,006 ae o loo filo ai ma le to’asefululima o tamafanau a Samoa o loo galulue ai i luga o lea meli la’upasese tele mai Europa.
Ua faailoa e le kamupani vaa a lo tatou malo le Samoa Shipping Services o loo feagai ma feutana’iga mo galuega faaseila a alo ma fanau a Samoa i luga o vaa oloa ma vaa meli o le kamupani o le MSC, e to’avalu seila o alo ma fanau a le atunuu o le a nonofo pe a taunuu lea malaga ae sui atu i le isi vasega fou o seila e to’avalu foi.
O le a nonofo ai foi i Samoa ma le pasese e to’atolu o sitiseni Samoa.
Ua faailoa e le kamupani vaa a Samoa o loo faaauau pea sootaga o le tatou malo ma lea kamupani mo le faafaigaluegaina o tamafanau a le atunuu ua a’oa’oina i galuega faaofisa ma galuga faaseila i luga o vaa oloa tetele ma vaa meli la’upasese a lea kamupani tele i le lalolagi.
E iva masina le umi o le a galulue ai i luga o lea meli la’upasese le vaega fou o seila mai Samoa ua sauni e malaga i le meli pe a tuua lo tatou atunuu i le afiafi o le Aso Tofi o lenei vaiaso.
O pasese o loo malaga mai ai o le a tafafao i mata’aga ma isi nofoaga o le tatou atunuu aemaise o le a sasaa a latou seleni i le faatauina o oloa eseese ma taumafa faapea nisi o le a faaaogāina auaunaga a taavale laiti la’upasese
