O le tele o tausaga o loo faagasolo ai polokalame a le SLC e ala ia latou faamalositino e pei o le zumba i vaiaso taitasi faatasi ai ma challenge e faamigoi mo le tai lua vaiaso e faamalosia ai le mamalu o le atunuu auā lo latou soifua maloloina.
O lenei poloakalame o loo taitai ai le afioga ia Silumanai Steve Aialeo o le faatina o le faletua ia Tofu Aialeo ma nisi o tamalii, faletua ma tausi faapea alo tamaitai o loo galulue i totonu o lenei polokalme.
O le tele lava o tausaga e maitauina ai le toatele o le mamalu atunuu i tama ma tina matutua e agai atu e faatāua lenei anavatau ma le faamalosiau mo latou.
Ae le gata i lea o taimi o le tausaga e fai ai taufetuliga i le tai lua vaiaso e saili ai le tagata e pau maualalo lona mamafa, faaitiitia ga’o o le tino (bodyfat) ma le faaitiitia o le ga’o o le fatu, ae o le ogatotonu o le tausaga ma le faaiuga o le tausaga e tai fa vaiaso e fai ai lea taufetuliga umi e luitau ai le tagata i ana meaai e tatau ona tausami ai.
O le tumutumuga o polokalame a le SLC ia iai se feau lelei e mafai ona faatāua ai e le tagata lona ola maloloina e ala i lona tino, auā o le tino o le tagata e tele lona tāua i le soifuaga lenei a lelei ona tausi o lea maua se tino malosi, mafaufau lelei ma le agaga lelei.
O le tino foi o le tagata o le malumalu lea o le Atua e pei ona ta’ua e le Tusi Paia ma e tatau lava ona tausi lelei.
O le po o le Aso Faraile na faaiuina ai polokalame a le SLC mo lenei tausaga e ala i le latou fiafia ma le laugatogi e tolaulauina ai i latou ua faamanuiaina i le fa vaiaso o le taufetuliga sa fai.
E tolu vaega sa agai iai le taufetuliga (challenge) o le pau i lalo o le mamafa (weight) faaitiitia gao le tino (body fat) ma le faaitiitia o le gao o le fatu (visual fat).
O le itupa o alii e silia ma le 40 i latou sa tauva, ao le vaega o tamaitai e silia ma le 50 i latou sa auai ae ese mai le vaega o fanau.
O le maota o Samoa i Magele sa faataunuuina ai lenei faamoemoe ma o le tina malolo ia Feauina sa tatala aloia le polokalame i le sauniga lotu.
Sa faatumulia lea afiafi i aiga ma uo sa molimauina taumafaiga a le SLC i ana polokalame faaiu i lenei tausaga.
E tele faafiafiaga eseese sa faanofo filemu ai le po sa maua ai le ata ma le fiafia e nai tagata matutua sa iai.
O le susuga i le taitai ia Silumanai Steve Aialeo sa fofogaina i latou sa lautogia i lea po.
Top 5 mo Alii
- Elu siamupini o le tauvaga aofaiga o vaega e tolu na finau iai mo le fa vaiaso e 45.9
- Sefo – 42.7
- Henry – 41.8
- Tiatia – 40.2
- Ulipa – 36.6
TOP 5 mo Tamaitai
- Leitu Aialeo –22 (siamupini o tamaitai)
- Petra – 21.9
- Lia – 21.2
- Hayley – 20.9
- Zinta Seiuli – 20.5
Na taualuga lea po i le saunoaga matagofie a le faatina o le SLC ia Tofu Aialeo e faafetai ai i latou sa galulue i le polokalame a le SLC i lenei tausaga aemaise ai o lana faafetai i le mamalu o le auvalaaulia i lea afiafi sa auai faatasi ai ma lana faamanuiaga o le kirisimasi ma le tausaga fou i aiga uma lava a le SLC.
