Ua toe 3 masina nei masina ona faamuta lea o le polokalame fesoasoani fai faatasi a Niu Sila ma Ausetalia ua faaigoaina o le PHARMA Plus, o loo tulei malosi ai tapenaga mo le lelei o oloa gaosi ma fua o faato’aga a Samoa mo le auina atu i maketi i fafo mo fefaataua’iga.
O se polokalame e lē gata o Samoa o loo faamanuiaina ai ae o isi atunuu o le Pasefika.
Ua faailoa i se pepa o faamatalaga le mae’a o se faatasiga sa usuia i Samoa sa auai sui o isi atunuu o lenei faaitulagi sa talanoaina ai nisi auala sili ma lelei e fesoasoani ai i faifaato’aga ma le ‘au gaosioloa ina ia matuā tapena lelei a latou taumafaiga ina ia ausia tulaga maualuga e tauva ai ma oloa gaosi ma fua o faato’aga a isi atunuu.
O le talo mai Samoa se tasi o fua tau faato’aga o loo alumia i maketi i fafo, ae ua faaopoopo atu iai ma le laau o le ‘ava lea o loo atina’eina e nisi o faifaato’aga i le atunuu.
Ua faamoemoe lea polokalame fesoasoani a Niu Sila ma Ausetalia a tapunia i le faai’uga o le masina o Iuni o le tausaga nei lea lagolago, o le a faaauau pea le fesoasoani i se isi polokalame fou.
Ua 15 tausaga o faatino le polokalame o le PHARMA Plus a ia malo e lua ua molimauina sa matuā lelei ai tapenaga o oloa gaosi ma fua o faato’aga mai Samoa sa auina atu i maketi i fafo.
