E lē o toe faauō Samoa ma Niu Sila ae ua avea nei ma aiga e tasi.
O ni vaega ia o saunoaga mai Palemia o Malo e lua na faalogoina i sauniga amata o le asiasiga taualoa mai i Samoa a le ta’ita’i o le malo o Niu Sila le afioga Tuisinavemaulumotootua Christopher Luxon ma lana aumalaga e pei ona talimalo ai le malo o Samoa i le amataga o lenei vaiaso.
O sootaga o atunuu e lua e tele lona talafaasolopito mai tausaga ua tuana’i i taimi o pulegamalo faakolone se’ia oo ina tatou tuto’atasi mai ia pulega.
O le aumai o le lagolago a Niu Sila i le atina’e o Samoa mai lava i a’oa’oga, le soifua mālōlōina, faato’aga ma faigāfaiva ma isi taumafaiga o le atina’e o le tatou tamaoaiga o pine faamau matamata tetele ia o le vavalalata o sootaga o atunuu e lua.
Ua faailoa e le Palemia o Niu Sila le aumai o le lagolago a lona malo e faaauau ai ona fesoasoani ia Samoa e pei o maliega ua sainia e galulue faatasi ai auaunaga o le tiute a malo e lua o loo leoina tuaoi o atunuu faapea galuega faaleoleo.
O le tatalaina o le maketi fou i Savalalo na faatupe i se foa’i a Niu Sila e 20 miliona tālā Samoa ma lagolago iai lo tatou malo lea e mae’a ane ua 30 miliona tālā Samoa le tau atoa o lea galuega tele.
O se vaega o le saunoaga a le Palemia susuga Laaulialemalietoa Leuatea Polataivao Fosi i le tatalaina o le maketi fou i Savalalo.
Sa saunoa ai foi le Palemia o Niu Sila.
Afioga Tuisinavemaulumotootua Christopher Luxon le Palemia o Niu Sila.
