Ua maitauina o se vaega to’atele o le autaalo a Niu Sila ua filifilia mo taaloga a malo o le Taupulega i le tausaga nei i Birmingham, e maualuga ai le aofai o le itupa o tamaitai.
O Commonwealth Games ia ua faailoa mai e aofia ai le autaalo e 233 a Niu Sila mo taaloga e 19 o le a auai ai ma Para Sports e lua.
Fai mai i latou o loo tapenaina le faamoemoe e 54 pasene o le autaalo e tusa lea ma le 125, o le itupa o tamaitai ma o le uluai taimi lea ua faamauina ai se aofaiga tele o tamaitai i ia taaloga e fai ma sui o Niu Sila.
Ta’ua i le lipoti o le autaalo e eseese uma tupuaga e aofia ai alii ma tamaitai e iai pito Samoa, Tonga, le Atu Kuki, Fiti, Filipino, Saina, Ausetalia ma isi foi mai Europa ma Aferika. E 46 le autaalo Maoli ua filifilia foi mo ia taaloga e amata i le aso 29 o le masina nei.
