Ua faaopoopo atu nei Samoa i le lisi o atunuu e silia ma le 135 o le lalolagi ua latou sainia le feagaiga e tatala ai malaga a vaalele ma le malo tele o Amerika, le Open Skies Treaty.
O le afiafi o le Aso Gafua i le faletalimalo o le Taumeasina Island Resort na sainia ai lea maliega i le va o le Palemia o Samoa le susuga Laaulialemalietoa Leuatea Polataivao Fosi ma le Sui Failautusi o le Setete o le malo o Amerika o Christopher Landau, a o molimauina e le auvalaaulia o sui o le malo o Samoa ma malo i fafo o loo iai ofisa o o latou malo i Samoa, aemaise sa auai ma le Kovana Sili o Amerika Samoa le afioga Pulaalii Nikolao Pula.
O se fesoasoani lelei lea mo Samoa e lē gata i le atina’e o pisinisi tau femalagaa’iga i vaalele ae o tagata tafafao.
Le Palemia o Samoa i lana saunoaga i le sainia o le feagaiga e tatala ai malaga a vaalele i le va o Samoa ma le atunuu o Amerika, ae o se feagaiga foi e tatala ai malaga a vaalele e afea ai Amerika Samoa ma faaauau mai i Samoa faapena foi i le malaga atu mai Samoa, afea Tutuila ma Manu’a ma faaauau atu i le Iunaite Setete o Amerika.
O lea sauniga na tauaao aloa’ia ai foi e le Sui Failautusi o le va i fafo o le malo o Amerika le foa’i o pulou ma laei talipupuni e faaaogā e leoleo i le puipuiga o lo latou saogalemu pe a faatino ni tiute e mana’omia ai ia meafaigaluega.
Ua talafeagai ia meafaigaluega ma le galuega o loo sa’ilia ai e leoleo nofoaga o loo faafailele faasolitulafono ai fualaau faasāina.
Na auai le to’atele o le auvalaaulia i le sainia o le feagaiga ma le tauaaoina o lea foai ma faia ai le tali faaaloalo a le sui failautusi poo se faaafe i se fiafia o le afiafi.
O le po o le Aso Gafua na toe tuua ai Samoa e le Sui Failautusi o le Setete ma lana aumalaga.
O le saunoaga a le Palemia o le tatou malo na ia faaoo atu ai i le Sui Failautusi lona mana’o pe a toe faaolatia i fanua lana faigāmalaga ina ia momoli atu ona alofa’aga i le Pelesetene o Amerika o Donald Trump.
