Ua faafalepuipui nei mo le 18 masina se tinā mai Nelesoni, o Paula Trainor, ina ua tele avanoa na tuu iai e le faamasinoga i ona moliaga o le avetaavale e ui ua leva ona faasā, e aofia ai le aveina o le taavale a o iai faatasi ma tamaiti i totonu.
O le vaiaso talu ai, na matuā tutulu Trainor ma augani i le faamasino mo se isi ona avanoa, ae e le’i toe talia e Judge Jo Rielly, o le faamasino na ia tuuina atu foi le avanoa ia Trainor i le isi ona moliaga ma le’i falepuipui ai, ae o lea la ua faatino loa lana faai’uga ma faasala Trainor i le 18 masina i le falepuipui.
E lua moliaga na molia ai Trainor, o le aveina o le taavale a o faasala mo le taimi lona tolu i le lē tatau ona toe tago i le foeuli; o le taimi lona lua na molia ai foi i le moliaga lava lea, ae sa iai ma tamaiti laiti e to’alua i totonu o le taavale.
O le taimi foi lena na molia ai i le avetaavale faatamala, ina ua ia so’aina se uilavilivae sa vili atu i le auala ma so’a se faailoilo i le auala.
I le Faamasinoga Faaitumalo i Nelesoni na faia ai lenei matāupu, na saunoa ai Judge Rielly i le tinā na molia, o le faa 13 lea ona molia oe i lou aveina o le taavale ae o loo e iai i faasāsāga ma o se itu ua matuā faapopoleina ai, e aofia ai lou aveina faasolitulafono o le taavale ae o loo iai ni tamaiti laiti se to’alua i le taavale
O le ogaoga tele o moliaga o lenei tinā, na taunuu ai loa le faamasino ua tatau lava ona tuu atu loa Trainor i le falepuipui mo sona faasalaga.
E lē gata i lea, ua se’ia foi le laisene avetaavale mo le tausaga atoa.
E iai foi isi moliaga e faasaga lava i lenei tinā o loo taatia ai pea i le faamasinoga.
Puna o Faamatalaga: https://www.newstalkzb.co.nz/news/crime/mother-jailed-after-ignoring-driving-ban-13-times-caught-with-children-in-the-car/
