O se tala faanoanoa foi e pei ona lipotia i le NZ Herald i le taeao nei, ua faamautinoa mai e le alii sa taalo i le tulaga o le prop a le Highlanders ma taalo foi i le ‘au tele a le atunuu le All Blacks, si alii o Angus Ta’avao, le uma ai o le ola o si ona atalii o Leo mai se ma’i na aafia ai.
I luga o lana itulau i le Instagram o loo tusia ai e Angus lenei faasilasilaga faanoanoa, ma faaleo ai le agaga nutimomoia o ia ma le aiga ina ua uma le ola o si ona atalii a o si’osi’omia e si ona aiga pele.
Na vave ona lalago atu iai le anoanoa’i o uo uma a Angus o tama taaalo ma le loaloa o le atunuu e silafia lenei alii taalo ma lona aiga i upu o faamaisega ma faamafanafanaga.
O le tamaitiiti o Leo e tusa ai ma lipoti, na fanau mai e aafia i se ma’i e ta’ua o le Trisomy-13, o se genetic disorder e afaina ai le malosi o le tamaitiiti e tuputupu a’e.
Na fanau le tamaitiiti i Ausetalia a o taalo ai Ta’avao mo le Waratahs ma e ola ane si ona atalii e ma’ima’ia ma tele ai lava ina fai mo ia le falema’i o tamaiti i Aukilani le Starship.
O le 2023 na faia ai e Ta’avao se faatautu’i i lona jersey All Blacks lea na ofu i le taaloga na red card ai ma faia’ina ai le All Blacks ia Aialani i Dunedin i ‘ai e 23-12, o le faamoemoe ina ia sa’ilia se seleni e fesoasoani atu i le falema’i o tamaiti.
O sa’afi’afiga a le alii taalo mo si ona atalii, ua toe tomānatu ai i le tele o lu’itau na latou uia i sa’iliga togafiti mo le ma’i o si ona atalii, o lea ua faato’ā tasi le tausaga talu ona alu i le a’oga, ma o se mitamitaga le vaai atu i lona tuputupu a’e, ae o lenei ua toe afatia lana folauga e le oti.
E momoli ai faamaisega i le alii taalo, Angus Ta’avao ma le aiga faavauvau.
