Ua faamalosia atili e leoleo le latou puipuiga i se tasi o kolisi i le faaitu ogatotonu o Aukilani poo central Auckland, ina ua lipotia ni faiga faamata’u na faia ane e tamaiti a’oga o se isi a’oga i tamaiti o lea kolisi, ma o le faalua ai lea ona tula’i mai lenei faafitauli i totonu o le vaiaso.
Na faailoa e le pulea’oga o le Western Springs College, Ivan Davis, se fe’au i luga o le Facebood a le a’oga, e logoina ia mātua o lea o le aA iai leoleo e taamilomilo i le kolisi i Pt Chevalier, mo le puipuiga mai ni faiga sauā e ono tula’i mai ma puipuia ai le saogalemu o le fanau a’oga.
Na ia faailoa, e iai tamaiti mai se isi a’oga na latou faia ni faamata’uga i tamaiti o le latou kolisi i le Aso Tofi o le vaiaso talu ai.
E ui e le’i iai se mea na tupu i le lotoā a le a’oga, ae na mulimuli ane i lena lava aoauli na tula’i mai se feupua’iga i le nofoaga faatalipasi i Great North Road.
Na ta’ua e Davis, ua siitia atili leoleoga a leoleo i le a’oga i le aso ananafi, ina ua toe iai isi faamata’uga na faia i luga o le social media mai nisi o tamaiti tuai o lea a’oga.
O loo galulue faatasi faia’oga ma aiga o tamaiti o loo aafia, ina ia taumafai e fofō le faafitauli, ma ua iai auala ua faatulaga mo le saogalemu o tamaiti i le taimi e toe foi ai i fale pe a tuua le a’oga.
Fautuaina foi e le pulea’oga mātua ina ia talanoa ia latou fanau, e tāua tele le aua ne’i o ese atu mai le a’oga e aunoa ma se faatagana mai faia’oga.
Puna o Faamatalaga: https://www.nzherald.co.nz/nz/police-boost-presence-at-aucklands-western-springs-college-after-threats-made-to-students/MTQAKGG3JFFLZPXSLHCUEZRIHU/
