O le afio’aga o Vaiala i le itumalo o le Vaimauga na avea le atunuu o Nauru ma latou paaga e autū iai a latou teuga aai, i le taligamalo a Samoa i le Fono a Malo o le Taupulega ia Oketopa o le tausaga na te’a nei.

Sa faatino ai e le nuu se tali faaaloalo mo le Pelesetene o lea Malo a o iai i Samoa ma lana aumalaga i le taimi o lea fonotele faavaomalo.

Peitai o lea ua sauni folau i Nauru e auai i polokalame o le faamanatuina o le Tuto’atasi o lea atunuu o le Pasefika, se aumalaga e 37 mai le afio’aga o Vaiala, e mafua mai ona o le taligamalo a Samoa i le Fono a Malo o le Taupulega, ua fanau mai ai se soo poo se mafutaga vavalalata a le malo o Nauru ma lea afio’aga o le atunuu. 

O se pepa o faamatalaga ua faailoa ai o sui o le aumalaga to’atele e tuua Samoa i le afiafi o le Aso Lulu o le vaiaso nei, a o se isi vaega o le aumalaga na tuuvaa atu mo Nauru i le faai’uga o le vaiaso na te’a nei.

Ua aofia i le aumalaga nisi o tulatoa o le nuu e pei o le afioga Tofaeono Leavasa ma le afioga Patu Dr Paniani ma le faletua, o le susuga i le faifeau ma lona faletua o le Ekalesia Faapotopotoga Kerisiano Samoa i Vaiala, o se matai tulafale tāua o Vaiala le tofa Manogiamanu Etuale, ma sui o le autalavou a le EFKS a Vaiala.

Ua tapena le autalavou e faatino ni faafiafiaga faasamoa i le faamanatuina o le tuto’atasi o Nauru e pa’ū tonu i le Aso Faraile o le vaiaso nei le aso 31 o Ianuari o lenei tausaga fou.

Ua faamatalaina le masii atu o sui o lea nuu ma lana aumalaga o se matāti’a ua ausia e se afio’aga o se atunuu i le Pasefika ua valaaulia i se faamanatuga o se tuto’atasi o se isi malo o le Pasefika.

Ua faamoemoe e toe taliu mai le aumalaga a le afio’aga o Vaiala i le Aso Faraile o le vaiaso a sau.