E toa 6 fanau aoga mai nisi o Kolisi i totonu o le atunuu o loo iai i Iapani i se polokalame e tauala mai i le Matagaluega o Aoga Taaloga ma Aganuu ma le Malo o Iapani. 

O lenei polokalame ua ta’ua o le Sakura Science Program o loo valaaulia ai tamaiti aoga o Kolisi mai i le atu Asia ma le Pasefika e aofia ai ma Samoa. 

Na maua se fesootaiga ma lē o loo taitaia lenei malaga, Allie Faletolu o ia foi o le Pule Aoga a le Kolisi a Itu o Tane i le motu tele i Salafai e tusa ai o lenei avanoa tāua mo fanau aoga a le atunuu. 

“O le polokalame lenei ua mafai ai ona omai tamaiti mai Samoa e tilotilo ma maimoa i le tulaga o loo faatautaia ai e aoga a lenei atunuu mataupu faasaienisi, e le gata i lena ae o le molimauina o le saoasaoa o le tekonolosi i nei atunuu. 

“E maoa’e le tulaga o aoaoga male tomai oloo faaaogaina i aoga a Iapani, pei ona iai a matou asiasiga i Iunivesite i totonu o Osaka ma Kyoto i vaega eseese tau faasaienisi e pei o mataupu i le Chemistry ma vaega tau faatoaga o le metotia eseese e faaaogā ai le vai i togalaau ma le tele lava o nisi vaega mananaia na matou asia.

“Ia ma le naunautaiga a matutua ifo tamaiti nei ia iai so latou faamoemoega e apalai i sikolasipi a Iapani e pei ona iai avanoa o loo faasalalau e le ofisa a Iapani i Samoa.

“O le mea moni e ese ma le matagofie o nei avanoa e lē aumaua e o tatou tagata, e pei o se vision e tuu lelei i le mafaufau o le tamaititi a matua ane ae o la e iloa avanoa e faalauaitele ai le poto salalau.

“E ui i le eseese o gagana ma aganuu ae ao ina tagai i avanoa nei auā foi a silasila iai i avanoa o loo maua e fanau e sikola ai i Niu Sila ma Ausetalia e laititi lava se fuainumera ae o sikolasipi o loo tuuina mai e lenei atunuu o le isi choice lea mo le tamaititi la e naunau ia manuia laasaga o le ola aoaoina.

“I la’u ia vaai iai e le tatau ona fiu se tamaititi e sau e sikola ma aoga i lenei atunuu auā foi e mautu resources ma mea uma e faatino ai aoaoga i Iunivesite.

“O loo aoaoina ai foi a’u o se faiaoga mai lenei polokalame ona o tatou i Samoa a oo loa i luga o vasega maualuluga, puluafi loa ma le alu assuming e malamalama uma tamaiti lea e te tautala iai. 

“Ae o lea ua ou sau i lenei polokalame e oo lava ia ta ita lea ua matua lota mafaufau e fetuunai mea ua oo lava i le savali i le pasi, tietie i le pasi ma isi mea e step by step lava mea uma.” 

“E ta te ita ai la ona e time consuming nei gaioiga uma ae a ota toe nofo ma mafaufau do not assume e tutusa uma le ability o tamaiti o le ala lena ou te fai atu ai e ese ma le aogā o lenei polokalame ia tatou.” 

Na ta’ua e Faletolu o se vaega lelei foi lea e fefaasoaa’i ai fanau aoga mai le atunuu ma tamaiti o isi atunuu. 

“E le gata ina fesoasoani lenei polokalame i le tomai faapitoa mo le agai luma o fanau aoga ae o se avanoa e build ai la latou network ma isi tamaiti.” 

O sui mai Kolisi e aofia ai le Itu o Tane, Kolisi a Palauli, St Marys, Kolisi a le Faatuatua ma le Kolisi o Vaimauga ma e tasi le vaiaso o loo auai ai i latou i lenei polokalame.