Ua tuuina atu se tusi i mātua o tamaiti aoga i Vitoria e silia ma le ta’i valu tausaga le matutua, una’ia ai le faia o talifofoga pe a agai i aoga. O le tusi mai totino o loo fai ma sui o faalapotopotoga tuma’oti ma le lautele atoa ai ma aoga a le Katoliko ua talosagaina ai le una’ia o lea tulaga mo le saogalemu o le fanau mai le toe pesia i le Koviti. 

E lē o faamalosia lea tulaga e le malo peitai fai mai le matagaluega o aoga i le tusi lea, o le talosaga lava ina ia fesoasoani i itu tau le puipuiga ma le faaitiitia o aafiaga o le faama’i. 

O loo faamauina foi le talosagaina o tamaiti aoga e faia talifofoga i nofoaga mo feoa’iga lautele. Ua faaopoopo pea le aofai o tagata e aafia i le koviti i setete uma o Ausetalia i le taimi nei.