O le toe alia’e o nisi o pepe ua aafia i le gasegase o le pneumococcal disease lea na uma ai le ola o se pepe mai Brisbane i le 2021 ua toe fafagu ai ma le valaau mo se tuipuipui o lea faama’i ina ia faatinoina loa mo puipuiga.
E na o le 6 masina o si pepe e pei ona ta’ua e igoa ia Mabel na uma ai lona ola i le pneumococcal meningitis o se siama e osofa’ia ai le fai’ai tulou aemaise māmā ma le fatu.
Fai mai lipoti ua siitia le aofa’i o ē ua aafia ai ma o loo faatuai le faatinoina o tuipuipui ona o loo iai se tulaga o loo taofia ai.
Fai mai ua silia ma le 4,500 le aofa’i o ē ua aafia i le atunuu atoa talu mai le 2023 e fua i faamaumauga mai le Immunisation Foundation of Australia.
O loo lapata’i mai i latou ia e lē taumate o le a vaaia le siitia pea o le numera o ē aafia pe afai e lē faia loa ni tuipuipui ma ua valaau ai i le malo ia faamuamua le tulaga lea mo le malupuipuia aemaise lava i le fanau.
O loo ta’ua i faamaumauga e na o le 20 pasene o tagata Ausetalia i le va o le 19-71 tausaga le matutua ua faia tuipuipui o lea faama’i.
Fai mai nisi lipoti o le pneumococcal meningitis e masani ona aafia ai pepe ma tamaiti laiti i lalo o le 19 masina le matutua aemaise foi tagata matutua ma i latou e aafia i gasegase o le māmā, fatu ma isi.
Puna o Faamatalaga: https://www.9news.com.au/national/pneumococcal-vaccines-australia-warning-against-new-strain-of-disease/8c579c02-c96e-4557-af66-65dabe9a61ec
