O galuega i le pulea o se malo ma faaletonu e faapena ona tutupu mai i nisi o taimi e avea ma faapaia mata i le tulaga sologa lelei o pulega a se faigamalo, o le pitolaau i le tomai faatusitala e suesueina ai ni faaletonu ma ia mautali se faigamalo e faamatala mafuaaga o se faaletonu mo le silafia e tagata lautele.

Peitai e iai lu’itau e feagai ma tusitala i le tele o taimi e faatino ai se suesuega ma o le mafuaaga lea o le fesoasoani o le UNDP o se lala o Malo Aufaatasi, e tapu’e le tomai faatusitala e fesoasaoni ai ia latou suesuega.

O nisi o lipoti talu ai nei i le vaa na sau mai Amerika Samoa e leai ni pepa, o le faatonu e se minisita o le Kapeneta o le pulega o le faalapotopotoga o vaa e taofi le sau o le vaa mulimuli mai Salelologa ae faatali mo ia ma lana aumalaga, o nisi ia o mataupu sa avea ma lu’itau i le aoaoga ua mae’a a tusitala ma le sui o le UNDP, sa faatalanoa ai le tāua o le suesueina o ni faiga faaalatua e aafia ai ē o loo taiulu ma taitaia se malo.

O le naunautaiga o le polokalame fesoasoani a lea lala o Malo Aufaatasi, ia faatāua e i latou o feagai ma tautua i totonu o se malo le tulaga aloaia ma le va fetausia’i ma le galuega faatusitala.

Ua mae’a sainia e Samoa le feagaiga faavaomalo a Malo Aufaatasi e tetee ai faiga faaalatua ma gaioiga faapiopio poo corruption, e faapena foi ona mae’a talia e Samoa le feagaiga a Malo o le Pasefika e ta’ua o le Teieniwa Vision, Pacific Unity against Corruption sa sainia i le atunuu o Kilipati i ni tausaga e lei mamao tele atu.