O le faailogaina e Samoa o le aso faapitoa o meatotino a le lalolagi poo le International Intellectual Property Day, ua ave ai se lu’i tāua i o tatou tagata faipisinisi ma o loo iai taleni ma tomai faapitoa e pei o le fatu pese ina ia faatāua a latou meatotino.
E pei ona silafia o le faamauina faaletulafono o se fatuga tau pese, poo se ata sa tusia, ae poo se tusi foi ua lolomi ma ua iai ni tala fatu mai mafaufauga o se tusitala, o meatotino faapitoa ia e tatau ona aputiputi, mai le ave faagaoi e isi ma faaaogā e pei o se latou meatotino ma maua ai ni faamanuiaga e faateleina ai lona tamaoaiga.
O le saunoaga a le Minisita o le Matagaluega o Alamanuia, Pisinisi ma Leipa i le faailogaina o lea aso faavaomalo ma sa auai ma nisi o le aufaipisinisi sa faailoa ai e le Minisita le afioga Leota Laki Lamositele Sio, o le autu o tapenaga o lenei tausaga o le mataituina o le aogā o meatotino tau le atamai, mo se lumanai manuia e gafataulimaina.
Le Minisita o le Matagaluega o Alamanuia, Pisinisi ma Leipa, afioga Leota Laki Lamositele Sio.
