E lua aso lea ua tuu atu i tagata ua api ma faamautū i le camping site i Whanganui e tapena ese ai.
O le taeao ananafi lea na asia ai e leoleo faapea sui o le puleganuu le Anzac Parade ma tuu atu iai i tagata e tusa ma le 15 o i latou, tusi ua faatonuina ai le tatau ona tula’i ese.
E na o le lua aso lea ua tuu atu iai e le puleganuu e tapena ese ai ma o se faai’uga ua faia e le puleganuu e lē gata mo le soifua mālōlōina ae o le saogalemu.
I se molimau mai ai le puleganuu, ua lē saogalemu e lē gata mo tagata nei e leai ni fale e nonofo ai ae faapea tagata lautele o loo fia o i le vai.
O le camping site lenei na faataga i taimi o le Koviti, ma talu mai lea taimi e oo mai i le asō ua fai ma nofoaga e nonofo ai tagata ua leai ni fale.
A o le’i faia le faai’uga a le puleganuu ua iai nei, e iai lipoti o le to’atele o i latou nei e iai soligatulafono ma ua tele foi faaseā ua faaoo ane i le puleganuu faasaga ia i latou nei.
Puna o Faamatalaga: ‘Significant risk to the public’: Homeless given two days to leave Whanganui camping site | RNZ News
