O le avetaavale lea na lavevea ai nai tamaiti e to’afitu ma maliliu ai le to’afā i le itu i Sisifo o Sini i le silia ma le lua tausaga talu ai, ua lipotia mai i le aso ua faaitiitia nei le taimi o lona faasalaga.
O le faalavelave lea na faate’ia ai le to’atele ma alu foi i lipoti i televise ma leitio i atunuu i fafo, maliliu ai le fanau e to’atolu ma le latou tausoga e to’atasi. O le avetaavale o Samuel Davidson na ia ioeina ona moliaga i fasioti tagata pa’ivalea ma faasala ai e tatau ona tuli le 28 tausaga i le falepuipui ma e tatau ona tuli le 21 tausaga faato’ā agavaa mo le palola.
O le asō la ua faailoa mai i le mae’a ona faafofogaina o le apili ua toe faaitiitia mai ai le faasalaga i le 20 tausaga i le falepuipui ma e tatau ona tuli le 15 tausaga faato’ā agavaa i le palola. Lona uiga e amata agavaa i le palola i le 2035.
Talu ai nei sa valaaulia ai le aiga lea o Abdullah family e faasoa la latou tala poo le story e uiga i le faalavelave i le vatikano ma patipatia ai e le to’atele le mau a sia foi ulugalii i le loto faamagalo i le avetaavale mai lava i le taimi faato’ā tupu ai le faalavelave.
