O loo toe iloilo nei e le vaega a le Immigration Niu Sila le latou faai’uga na teena ai se visa mo si tamaitiiti 2 tausaga le matua, o Jonathan Ta’eiloa, ona o lea ua faalaa ane le Children’s Commissioner e matuā mata’itū le faai’uga lea a le Immigration.
O le taimi nei o loo taofia ai pea si nei tamaitiiti i le falema’i, o loo tigāina ai.
O Jonathan, e pei ona avatu ia tatou talafou i le vaiaso talu ai, na fanau i Niu Sila ia Setema o le 2023, ae na faalēaogāina lona tulaga faaletulafono o se tamaitiiti na fanau i Niu Sila ina ua teena lona visa i le masina talu ai, i ni māfua’aga tau le soifua mālōlōina, e ui o loo lelei visa o ona mātua ma isi ona tei.
Ae i se faamatalaga na tuuina ane i le vaega o news a le PMN, na faamautinoa ane ai e le operations director a le Immigration Niu Sila, Dominic Forde, o lea o loo toe iloiloina nei e le matāgaluega lea matāupu, aemaise lava i le tulaga ogaoga o le soifua mālōlōina o loo iai lenei tamaitiiti.
Matou te iloa mafatiaga o loo iai i le aiga o si nei tamaitiiti, ma o le a faaauau pea ona matou galulue faatasi ma si ona aiga i se tulaga alofa ma le faautauta.
