O le a faia se aoaoga e tauala mai i se poloketi o loo faatupeina e Peretania mo le 5 tausaga ma e taulai i le tāua o tusitusiga a le tusitala lauiloa o Ropati Lui Sitivinisone i le Pasefika.
O lenei poloketi e pei ona ta’ua e le Polofesa ia Michelle Keown mai le Iunivesite i Edinburg, e toe fafagu ai tusitusiga ma solo na tusiaina e le tusitala ia Sitivinisone a o aumau ai i Samoa.
“O le tasi lenei o manulauti o le poloketi ina ia faia aoaoga nei i Samoa e lagolago ma fesoasoani ai ia i latou o loo iai le agavaa tusitala ma fatusolo.
“E pei ona silafia a o iai le tusitala Sikotilani inei i le Pasefika, na ia faasoa ai tala mai lona atunuu ma fesuia’i ai i tusitusiga mai tagata Pasefika.
“Ma o i latou o loo galulue i lenei poloketi o loo iai le naunautaiga e faaauau pea lenei vaega i le va o Sikotilani ma Samoa.
“O se avanoa tāua foi lea mo i latou e iai le agavaa ma e mafai ona lagolago lenei aoaoga e lomia ai nei galuega.”
Saunoa foi se tasi o alo o le atunuu o le a faatautaia lenei aoaoga o ia foi o se polofesa ma o se tusitala iloga, Caroline Sinavaiana Gabbard mai le Iunivesite o Hawaii e uiga i lenei faamoemoe.
“O le taimi muamua lenei o lenei ituaiga aoaoga e ui sa iai ni aoaoga faapei o lenei vaega ae peitai o le taimi muamua lenei ua iai se aoaoga e sponsor pe fesoasoani ai foi lenei poloketi ia i latou o le a auai.
“O le a atoa le 40 tausaga talu ona ou iai i lenei auaunaga faafaiaoga e aoaoina le vaega o tusitusi i Iunivesite ma kolisi i Amerika ma Amerika Samoa, ma ou te tautino atu e ese foi le mataina o le tofa ma faautaga i tusitusiga a alo ma fanau i le gagana maotua o le Faa-Samoa.
“O le vaega foi lea o loo o’u maitauina i alo o Samoa ma o se tulaga lelei lea.”
O lenei aoaoga o le a amatalia i le masina o Iuni ma o le a vaavaalua ai Gabbard ma se tasi foi o alo o Samoa ma o se polofesa i tusitusiga ia Selina Tusitala Marsh mai le Iunivesite o Aukilani.
E lua ni vaega o le a agai iai mo le vaiaso muamua e mo i latou e 18 tausaga ma le au matutua ona sosoo ai lea i le vaiaso lona lua i alo ma fanau aoga.
