O Izack Tago, ua lipotia le faatulagaina o se tasi o tama taalo liki ogatotonu pito totogi tele i le taamilosaga a le NRL, i le kalapu a le Penrith Panthers ua tulalata i le faamautuina le siitaga o le latou feagaiga i le $3m.

O lea tama e 21 tausaga le matua, ua ta’ua o se auupega malosi mo le Panthers i tausaga talu ai nei, e pei ona faalua ai ona manumalo i le siamupini o le NRL i lea kalapu, ma fai ai ma sui o Samoa i taaloga faavaomalo.

E tusa ma le lomiga a le Sydney Morning Herald, o Tago ua ioe i tuutuuga mo le toe faaopoopoina o le latou feagaiga, lea o le a vaaia ai o ia o nofo ai pea i le auvae o le mauga seia aulia le 2028.

Ua mae’a lava ona saini Tago mo le Panthers mo le isi tausaga, ae o lana pulega ma le kalapu ua lipotia le naunau e lokaina lona lumanai i le Panthers, ona o le tuumuli ese o le kapeteni fou a le Bulldogs, ma le sui o le Toa Samoa, Stephen Crichton i le mae’a ai o le taamilosaga.

Ua lipotia ai, o le totogi fou o Tago e tusa ma le tolu kuata miliona tala i le tausaga.