O le faigapaaga lenei a se tasi o faalapotopotoga a Niu Sila ma Ausetalia ua ta’ua o le PHAMA Plus lea ua galulue ai ni faalapotopotoga failaau i le atunuu, le Faalapotopotoga Aiga Maaleale (FAMA) ma le Organix Mothers of the New Earth (OMONEA) ina ia mafai ona faatupulaia ituaiga laau i togalaau a le atunuu.

I faamatalaga mai lenei faalapotopotoga o le auga lava ia lava ituaiga eseese o laau toto e maketiina e tina fai togalaau o se tasi o alagatupe e fesoasoani ai i le tausiga o aiga.

E pei ona ta’ua e Sili Malaeolela Valerie Tuia o le sui o lenei faalapotopotoga o se tasi lenei o vaega o loo mātele ona vaaia i le taimi nei i aiga o le faia lea o togalaau.

“O le faipaaga mai ma le vaega lea mai fafo e ese foi lona tāua, ua mafai ai ona matou iloa ona faatino nei galuega auā a lava ma tele ituaiga laau eseese o le tele foi lena o le avanoa e siitia ai le tupe maua pe a faatau laau nei.”

Na ta’ua foi e le sui o le PHAMA Plus i Samoa Pueata Tanielu o le tiute faapaaga ma lenei faalapotopotoga o loo agai ai le vaai i le agai i luma o le maua pea o laau i soo se taimi ia faateleina ai mo tagata faatau.

“E toateele tagata o loo manaomia laau e faaaogā e pei o le teuteuina o nofoaga e faia ai se faamoemoe a tele la ituaiga laau e faia i le filifiliga a le tagata faatau o le tele foi na o le tupe maua ma atina’e ai lava le au failaau i le atunuu.”