Ia maua ni tina malolosi, ia maua ni aiga malolosi ma ia malosi foi le Komiuniti.
O le manulauti lea poo le anavatau o loo agai iai le polokalame a le Pacifica Inc i totonu o Niu Sila ina ia unaia tina e avea o ni tina malolosi i totonu o aiga, ma le komiuniti i vaega o loo galulue ma aumau ai.
O tausaga taitasi e faia ai fonotaga a lenei faalapotopotoga i pitonuu taitasi o loo faatinoina ai lenei faamoemoe, a o Aukilani lava latou na faataunuuina le latou koneferenisi a le Pacifica Inc i le Aso Toonai ua mavae i le Te Oro i Glenn Iness e toe iloilo ai nisi o mataupu poo ni vaega e ono faamalosia ai tina auā le manuia i totonu o aiga ma le komiuniti.
E 22 lala a lenei faalapotopotaga i totonu o Aukilani sa auai, ma e eseese uma atunuu e o mai ai i latou.
O Samoa o loo numera tasi tina o loo auai, ae o loo ai filofilo ai foi ma nisi o tina o loo iai o latou tofiga i totonu o le malo o Niu Sila.
O le tele o fesoasoani o loo agai iai le Pacifica Inc o totonu o aiga, o loo fesoasoani lea i mea tau manaoga masani o aiga e pei o meaai lavalava ma isi lava mea o loo manaomia.
O loo tuu atu foi le latou tau’au e fesoasoani ai i sikolasipi a le fanau, faapea lavalava aogā ma mea aoga mo tamaiti aoga.
O se auala ua maitauina ai le toatele o tina Samoa ua latou auai i totonu o lenei faalapotopotoga auā ua latou iloa ua manuia ai o latou aiga aemaise o fanau aoga.
O loo iai fesoasoani mai le malo o loo tuuina atu i lala taitasi a le Pacifica Inc e faaauau ai pea le latou galuega fesoasoani mo aiga lautele o le komiuniti.
Ua silia i le 20 tausaga talu ona faatuina lenei faalapotopotoga i totonu o Niu Sila, a o Aukilani ua ova ma le 10 tausaga lana tautua mo le komiuniti.
