Ua i luma o le Faamasinoga Maualuga le talosaga a le afioaga o Leauvaa ina ia faalēaogāina faaiuga a le Faamasinoga o Fanua ma Suafa ua mae’a ona faia o laueleele i tua o le 723 eka e pulea e Alii ma Faipule o Afega ma Fata ma Maulolo.
Na valaau lea mataupu i le vaiaso na tea nei, ma na poloaia e le afioga ia Leiataualesa Daryl Clark loia a le afioaga o Afega faapea ai ma Fanua ma Suafa le tuuina atu o ni a latou tali e faatatau i le talosaga a Leauvaa.
Mo le silafia e 9 faaiuga ua mae’a faia e le Faamasinoga o Fanua ma Suafa i lea mataupu, lea na afua ai na faagasolo galuega a Afega i le suaina o eleele i tua o le 723 eka e pulea e Fata ma Maulolo ma alii ma faipule.
O le talitonuga o Leauvaa e solitulafono ma solifaavae faaiuga a le Faamasinoga o Fanua ma Suafa, ma e tatau ona faalēaogāina.
O le vaiaso na tea nei na poloaia ai e le Faamasinoga o Fanua ma Suafa le tapena ese o aiga e lata i le toa 100 mai eleele o loo nonofo ai, ma e 4 vaiaso ua tuu atu e tapena ese ai.
O le valaauga o le mataupu i le Faamasinoga Maualuga o loo fesiligia ai pe agavaa le fofogaina o le talosaga i le Faamasinoga Maualuga talu ona iai suiga fou na pasia i le tulafono o fanua ma suafa 2020.
O le vaiaso nei e toe valaau ai lea mataupu.
