O le tina lea sa ia tatuiina lana paaga i totonu o se taputaele (se’i tulou), ua lauina lona iuga i le faamasinoga ma ua soloatoa i le falepuipui e lē ititi ifo i le 11 tausaga e tatau ona tuli o le faasalaga.
O le tina ia Carol Ann Coade na lauina lona iuga i le faamasinoga maualuga i Dunedin analeila ma e faatoa faailoa ai foi lea o lona suafa talu mai le faalavelave.
Na ia ioeina lona fasiotia o le tagata fai ata tifaga o Mark Henry Willis 58 tausaga ia Aokuso 2023.
E ono tausaga le umi talu ona mafuta lenei ulugalii a o lei tupu le faalavelave ma sa nonofo faatasi lava i Dunedin.
Pe a fua i faamaumauga a le faamasinoga, o le soifua maloloina o le mafaufau o Carol sa i se tulaga faaletonu talu le amataga o le 2023 ma iu ai ina ave ona aso ma’i mai lana galuega.
E faa 22 ona tatui e Carol lana paaga ma afaina ai ona totoga ma maliu ai lava.
