O le laau tau faatoaga o le manioka, e vave ona selesele ma faaaoga mo taumafa ma isi taumafaiga e pei o le maua ai o le masoa mo le gaseseina o isi a tatou taumafa e pei o vaisalo ma pisua.
O se laau tau faatoaga foi e faaleano tele iai le toatele ona e numela tasi lava le totoina o le talo, taamu, fa’i ufi. O le afioga Fuimaono Maiava Viiga ose matai o le afioaga o Salani i Falealili ua ia faatino se taumafaiga ua galulue ai ma nisi o tupulaga talavou o le nuu, e faato’a le 10 eka o le fanua ile manioka.
O le faamoemoe o lea tamalii ia atinae lea laau tau faatoaga e le gata mo le faateleina ai o taumafa, ae ia faaaoga e gaosi ai le falaomata i totonu o le afioaga ma fesoasoani ai i aiga. O le taimi nei ua opo le sefulu eka ile manioka ae ua toe faaopoopo le isi lima eka ma le faanaunautaiga ia tele se manioka e maua e faamalieina ai le maketi peafai foi e maua se faitoto’a e ave ai i fafo.
Ua fesoasoani malosi le vaega e ta’ua o le Pacific Islands Rural Agriculture Stimulus Project e ta’u faapuupuu o le PIRAS, i lea faifaatoaga manioka ile faaleleia o lana taumafaiga, ua aofia ai ma ni tupulaga talavou e toasefulu o le afioaga o Salani.
