O le tausaga e 2012 na tala ai le maketi sa iai muamua i Fugalei ma toe fausia i se fausaga ua maualuga lona faavae ma faaopoopo lona tele e pei ona iai nei.
I le sefulutasi tausaga talu ona tatala ma faaaogā ai le maketi fou ua iai nei i Fugalei sa tapunia i le 6 i le afiafi ma itula uma o le po, ae faato’ā tatala i le 6 i le taeao.
Sa faaleo ai lagona o le lē fiafia o nisi o le aufaipisinisi laiti auā ua lē gata ina tapuni i le afiafi ae faasā ona toe tofafā ai nisi i le maketi, auā o nisi o le aufaipoloka sa faamautū i le nofoaga ma aliali mai ai nisi popolega i le saogalemū o le soifua.
O le Aso Lulu o lenei vaiaso na faamuta ai le tapuni o le maketi i Fugalei i itula o le afiafi ma le po atoa, ina ua iai se isi faai’uga a le faalapotopotoga o taui o faalavelave faafuase’i o loo pulea lea maketi o se tasi o ana aseta ina ia toe tatala 24 itula.
O le Aso Tofi la o le vaiaso nei ua amata ai lea suiga i le toe tatala faasoloatoa mo pisinisi ma avanoa ai le atunuu e afea mo faatauga i soo se taimi o le aso.
Ua faia lea faai’uga ma le fautuaga ua ave i le aufaipisinisi laiti uma ma le aufaifaato’aga o faaaogāina le maketi i Fugalei ia tausisia pea tulafono ua faataoto mo le puipuiga o le saogalemū o le ola ma le soifua faapea ma le soifua mālōlōina lelei.
