Ua iai nei se faai’uga a le Kapeneta e tuueseese le Matagaluega o Tiute ma Tupe Maua i ni Matagaluega se lua, i le silasila mamao a le faigamalo e faaleleia ma siitia le tautua mo le atunuu lautele, aemaise o mana’oga o loo ofoina ai tautua a lea matagaluega o loo tuufaatasi ai nei galuega tau i lafoga totogi, ma tupe maua ma galuega o loo puipuia ai tuaoi ma le totogiina o tiute mo oloa eseese o loo faaulufale mai i lo tatou atunuu.
O le faatinoina o lea fuafuaga ua sailia ai nei se konesale poo se consultant na te tapenaina le lotoifale o le faataunuuina o lea finagalo o le kapeneta, ina ia faamalieina le ta’iala ua faataoto e fai ma ālafua e limata’ita’iina ai tapenaga o lea faamoemoe.
O tausaga ua tuanai sa lua auaunaga nei a le Malo lea sa ese ai le vaega o Lafoga ma Tupe Maua le Tax and Revenue Department ese foi le Ofisa o le Tiute, ae peitai ina ua iai fuafuaga a faigamalo ua mavae e toe vaevae matagaluega a le Malo ma ta’ua o ministry na tuufaatasia ai loa ia tautua a le Malo e pei ona iai nei.
