O loo faaaogā i le taimi nei le helicopter e momoli atu ai taumafa ma isi sapalai i le silia ma le 200 aiga i le itu i Saute o Wairarapa lea o loo motusia pea fesoota’iga ona ua motu ma malepe auala ona o lōlōga malolosi i le vaiaso talu ai.
O le afiafi ananafi na toe tatala ai le auala laupapa i le Lake Ferry, o se tama’i pitonuu i le talafātai i Saute o Wairarapa, ma ua mafai ai ona toe maua fesoota’iga mo nisi pe tusa ma le to’a 70 o loo nofoia lena pito.
Ae na saunoa lē o loo vaaia galuega lavea’i i taimi o faalavelave faafuase’i i Wairarapa, Simon Taylor, pe tusa ma le 200 tagata o loo motusia pea fesoota’iga i Ngawi, ma le isi to’a 30 o loo to’alia pea i Whāngaimoana.
O loo taumafai pea e maua ni sootaga atu i nei aiga ina ia iloa poo ā ni mea o latou moomia i le taimi nei mo lo latou soifua manuia, ae mautinoa o lea e ave le faamuamua i le momoli atu iai o taumafa.
Saunoa Taylor, o loo iai le popolega atonu o iai pea ni aiga o loo faatama’ia o latou fale ae e lē o mafai ona latou oo atu iai.
E iai se inisinia na asiasia le auala laupapa i Ngawi ma o loo faatalia nei e le pulega se lipoti mai lena asiasiga.
Puna o Faamatalaga: https://www.rnz.co.nz/news/national/587243/food-helicoptered-to-more-than-200-south-wairarapa-residents-cut-off-by-road
