E tulaga ese foi se isi faalavelave ua lipotia mai i Kuiniselani i le vaiaso nei, o se teine talavou 17 tausaga o loo i se tulaga tigaina ina ua feta’uaina mai ua tatui se’i tulou e lona tina.
Fai mai le lipoti mai le alaata 7 ua feta’uina ai le taumafai o le tina e faaoo le oti i lana tama teine ma mulimuli ai taumafai e faaoo man’ua ia te ia lava ma o le faalavelave o loo lipotia mai i le ogatotonu o Kuiniselani.
E 36 tausaga o le tina ma ua molia i le taumafai e faaoo le oti i lana tama teine i le afiafi lava ananafi. Fai mai o se alii e 20 tausaga sa iai i le fale i le taimi lea sa taumafai ane e taofi le osofa’iga ma o loo lipotia foi na osofa’ia foi e lē o loo tuua’ia. O le asō ua ta’ua e tulai ai lena tina i le faamasinoga e tali i moliaga ae lē o faailoa maia le mafuaaga o lenei faalavelave.
