Ua molia le tamā i moliaga e lua o lona susunuina o le hostel i Ueligitone poo le Loafers Lodge lea ua ma’umau ai soifua o nisi.
Ua lipotia e le Herald o moliaga e lua e aofia ai le mu na muamua tupu i le tusa o le ‘afa o le sefulu i le po o le Aso Gafua, a o le isi moliaga o le mu tele i le vaveao o le Aso Lua.
O ia foi o se tasi o tagata sa nofo i le Loafers Lodge hostel i Newtown ma e tulai i luma o le faamasinoga faaitumalo i le asō.
Faamaonia mai ai foi e leoleo e leai se isi o toe vaavaai iai i le taimi nei e molia ona o lenei mataupu, ma o le tamā ua molia e faapea e 40 ma ona tupu le matua.
E le o faigofie le taumafaiga e aveese mai tino maliliu o tagata na mu faatasi ma le fale ona o le lē saogalemu o fogafale taitasi ua faaleagaina e le mu.
E na o le lua tino maliliu na mafai ona aveesea mai ananafi, e faamoemoe e toe faaauau i le asō ma o loo tumau lava le fuainumera o tagata ua mautinoa ua maliliu i le faalavelave lenei lea e toaono, e ese ai isi o loo tau sailia pea e tusa ma tala mai leoleo.
