Ua faamanatu e se faamasino i leoleo o tagata e leai ni fale e nonofo ai, homeless, e leai foi la ni o latou tuatusi mo meli.

Ua mafua lea faamatalaga ina ua valaauina le mataupu lea i le faamasinoga na taofi ai e leoleo le taavale a le tagata lea mai Aukilani ona o le saosaoa, i le masina lea o Ianuari 2020, ma talafeagai ona tuuina iai le sala e pei ona masani ai i tulaga faapea peitai ina ua tāpā e leoleo lona tuatusi e lei mafai e lea tagata ona tuu ane se tuatusi ona o le taimi lea o loo aumau i totonu o lana taavale.

O i na pue ai loa e leoleo ona o le lē ta’uina ane o se tuatusi.

Na oo atu le mataupu i le faamasino o le faamasinoga faaitumao i Pukekohe, Judge Karen Grau, tasi le faamatalaga a le faamasino ua manino i faamaumauga o le mataupu e leai se tuatusi i lea taimi mo le lafoina iai o ni meli mo sia alii.

I lalo o le tulafono le Land Transport Act e mafai e leoleo ona talosaga le igoa atoa o le tagata, tuatusi, aso fanau, galuega ma le telefoni, fai mai le faamasino sa lei tatau i le leoleo ona finau pea mo se tuatusi ae ia faamautu ane se numera o se telefoni e fesootai ai.

Fai mai le faamasino o le aafiaga o le gaioiga na fai a leoleo i le mataupu lea ua foliga ua atagia ai o se tagata e leai se mea e nofo ai, homeless, e le mafai ona ave taavale faaletulafono i le atunuu ma e lē sa’o lea tulaga.

Ua talia le apili a lē na aafia ma ua faasee ese e le faamasino le mataupu mai le faamasinoga.