O le a le galo i le pasese a le pasi na alu lava i le taulaga i Aukilani e ui i le loloto o lologa ma ua lolovaia foi ma totonu o le pasi.
O le pasi lenei na toe aumai ai ma nisi o tagata matamata sa i le koneseti a Sir Elton John lea na toe taofi ae ua tumutumu tagata i le Mt Smart Stadium.
E lei feoai ni trains i lea po, ma na suia ai i malaga a pasi.
I molimau a se tasi o inisinia sa i luga o le pasi, e moni o lea sa lolovaia luga o le auala peitai o le latalata i le taulaga na faatoa amata sao atu ai le vai i totonu o le pasi.
Molimau ai foi i tala a le leitio a Niu Sila, e iai le taimi na alu alu opeopea ai le pito i tua o le pasi.
I lea taimi e lei iai ni faailoilo e faasā ai taavale i luga o le auala ma o lea na lototetele lava le pasese aemaise ai le avepasi e faaauau pea seia oo i le taulaga.
E ui i faitioga a nisi i luga o le social media, peitai, mai tagata sa i luga o lenei pasi fogafale lua o se malaga e fai o le lē iloa e le avepasi poo fea se isi auala a toe sulu iai ona e leai lava ma se auala tua na saogalemu i lea taimi ae e faigata ona toe foi.
O le tala fiafia na taunuu manuia le faigamalaga, e leai se isi o le pasese na afaina ma e le o leaga foi le afi o le pasi.
