E silia ma le 900 foma’i ua o latou lapata’i mai ua i se tulaga ogaoga le aufaigaluega a le soifua mālōlōina a o vaaia ai le toe siitia o le aofa’i o tagata e aafia i le faama’i atoa ai ma le faatupula’ia pea o gasegase o le koviti e taofia i falema’i. O le lapata’iga la a foma’i o loo agai i le malo e ono iai se lamatiaga ona o le tulaga o loo iai le aufaigaluega.
Sa faatino se su’esu’ega a le Women in Medicine Charitable Trust ma iloa ai le lē lava o le aufaigaluega i vaega eseese o le auaunaga.
I se tali a le minisita o le soifua mālōlōina Andrew Little i nisi o fesilil i le tulaga pagatia ua iai le auaunaga na ia ta’ua ai i le lima tausaga ua tulai mai ai le faigamalo ua o latou faaopoopoina le tusa ma le 5,500 o tagata faigaluega i le auaunaga a le soifua mālōlōina ma ua faaopoopo foi vaegatupe e fesoasoani ai.
Fai mai le ta’ita’i o le National Christopher Luxon poo le ā lava le tulaga e tau ai le faafitauli o loo tulai mai i le auaunaga a le soifua mālōlōina o le mea e ao ona fai o le gaioi e faatino le mea e mana’omia ona faia.
