Ua ioeina nei e le TGA poo le Therapeutic Goods Administration a Ausetalia se tuipuipui a le Moderna mo tamaiti. O pepe e amata mai i le ta’i 6 masina agai i le 5 tausaga ua faatulaga e agavaa mo le tuipuipui lea i Ausetalia nei.  

Faailoa mai e le 7News, se faamatalaga a le TGA, e pei ona vaaia i tamaiti e matutua atu e tatau foi ona maua le puipuiga o fanau mai le tuipuipui lea aemaise lava i le taofia o le faataotolia i falema’i pe ma’umau foi se ola. 

I le taimi ua sola sa na o tamaiti e matutua atu nai lo le lima tausaga sa mafai ona maua tuipuipui o le Koviti-19 ma e lē taumate o le maua mai o le faamaoniga lea i le asō o le a talia lelei e le to’atele o mātua sa tulituliloa pea se fesoasoani mo nai fanauiti e puipuia mai ai mai le faama’i.