O le aso ua amatalia aloaia ai le faagasologa o le polokalame mo le faamanatuina ai o le tāua o le siosiomaga e ala i polokalame ma fonotaga e faamamafaina ai le tāua o galuega mo le puipuia lelei o le siosiomaga i le atunuu.

I lenei faamoemoe na saunoa manino ai le Minisita o le Matagaluega o le Siosiomaga Afioga Toeolesulusulu Cedric Schuster e ao ina tutu faatasi ina ia laveai le siosiomaga e ala i gaioiga faatino.

“Ua tatau nei loa ona faia se galuega i le malosi e gata ai e laveai le siosiomaga tau i le gataifale, vaomatua, atumauga ma apovai faapea laau ma meaola.

“Faaleleia tapenaga ma puipuiga mai faalavelave faalenatura ma faamautu galuega a faalapotopotoga eseese, pisijnisi tuma’oti aemaise le mamalu lautele o le atunuu seia oo lava i fanau.

“E pei ona iai le vaaiga taulai a le Malo mo le manuia o Samoa i se siosiomaga mautu ma maloloina o le puipuiga e faasaoina ai tatou mai aafiaga o le tau ma faalavelave faalenatura.

“E tele polokalame eseese ua faataatitia mo lenei vaiaso atoa o le faagasologa o nei polokalame e aofia ai le faalauiloaina lea o nisi o suesuega ma le faatāuaina o malosiaga faafouina aemaise tulaga o suavai ma eleele apovai.”

O nisi foi o faatinoga mo lenei polokalame e aofia ai tapenaga i nisi o afioaga i taimi o faalavelave faafuasei aemaise o faatalatalanoaga ma afioaga e tusa ai o nisi o fuafuaga e auga lava i puipuiga o le siosiomaga mai suiga eseese o le tau o loo iai nei.

“O se tasi o vaega tāua o lenei polokalame o le galulue soosootau’au lea ma nisi o faalapotopotoga.”

O loo mafai foi ona auai mai nisi o sui mai le Malo o Amerika Samoa e tusa ai o mataupu o le a talanoaina ma le Matagaluega o le Siosiomaga.