O le fono faavaomalo a sui o le faalapotopotoga o atunuu Aferika, le Atu Kerepeane ma le Pasefika sa usuia i le atunuu o Angola na faailoa ai e le taitai o le Malo le afioga i le tamaitai Palemia, Fiame Naomi Mataafa, i lana folasaga i lea faatasiga a taitai o malo o lea faalapotopotoga, atugaluga o Samoa i le tuai ona sainia le maliega fou i le va o le faalapotopotoga ma le iuni o malo Europa le European Union, lea o le a faaigoa o le maliega i Samoa.
Peitai ua faailoa ise pepa o faamatalaga ua iai nei se finagalo o taitai o Malo Aferika, Kerepeane ma le Pasefika ina ia faatino loa le sainia o lea maliega a o lei mae’a le tausaga fou 2023, ma o lea maliega faavaomalo o le a sainia i Samoa.
O se tasi lea o fuafuaga tele taligamalo o le a sauni iai lo tatou atunuu ona e 79 atunuu o loo avea ma sui auai, ma o le 49 pasene o ia atunuu e mai le konetineta tele o Aferika, le Atu Kerepeane ma le Pasefika o sui o le faalapotopotoga o Malo Aufaatasi.
O le afioga i le tamaitai Palemia o Samoa sa fai ma sui o atunuu o le Pasefika i le fonotaga i le atunuu o Angola e momoli le faafetai i le Peresetene o lea atunuu i lana tapenaga i le taligamalo i lea faatasiga sa usuia i ni vaiaso e lei mamao atu.
O le Aso Tofi o le vaiaso nei na toe faaolatia mai ai i fanua le faigamalaga a le Tamaitai Palemia le afioga Fiame Naomi Mataafa ma lana aumalaga ina ua tapunia le fono lona 10 a atunuu Aferika, Kerepeane ma le Pasefika ma o le faatoa toe tauaofia lea o se fono a sui o ia Malo i le tuanai o le lua tausaga o tapunia uma tuaoi o atunuu ona o puipuiga mai le faamai Koviti-19.
