O le sootaga o tama o le aulakapi o le Manu Samoa i o latou aiga ina ia faatāua ai i o latou loto piitaga tau toto, o se tasi o manulauti o tapenaga a le aulakapi a le atunuu, e pei ona faailoa e le ta’ita’imalaga le susuga Su’a Hesed Ieremia, ina ua mae’a faaee le suafa Tagaloa i le kapeteni o le Manu Samoa, i le aiga o lona tuaa tina i le afioaga o Salelavalu i Savaii.
O le Aso Tofi na faaee ai le suafa matai o le susuga Theodore McFarland, i le faafotu alii sa faaee ai foi ma nisi o suafa tāua o le aiga.
O le talanoaga ma le ta’ita’imalaga o le Manu Samoa sa ia faailoa ai foi tapenaga a le aulakapi a le atunuu i le taamilosaga o le Ipu o le Pasefika i le masina fou, lea ua faamoemoe e tolauapi le ‘au i le afioaga o Sapapalii e sauniuni ai, a o lei tuua le atunuu mo lana taaloga muamua ma Fiti.
