Ua faailoa moomooga alofa ma faamaisega a nisi i le aiga o si tagata faigaluega a le Woolworths lea na maliu i le aso ananafi i se faalavelave na tulai mai i le nofoaga faigaluega i Minchinbury i Sini.

Ua lipotia e le 9News o ni pailate na solo i le factory lea a le Woolworths ma manunu’a ai tagata faigaluega e toatolu, ma na faailoa e leoleo e 37 tausaga o le tagata faigaluega na ave atu i le falemai i se tulaga tigaina ma maliu ai lava mulimuli ane.

Fai mai o le isi toalua o loo taofia pea foi i le falemai e tigaina foi manu’aga. 

O se sooupu a le Primary Connect se vaega o le auaunaga a le Woolworths, ua ta’ua ai ua tapunia nei le vaega lea o le kamupani, le distribution center ona o le faaaloalogia o nai tagata faigaluega ua aafia aemaise nai o latou aiga.

Sa ta’ua foi e ono iai se aafiaga i nisi o oloa i faleoloa i Sini ona o lea tulaga ma ua faafetaia foi tagata faatau i lo latou malamalama i le mataupu ua tulai mai.

Ua faailoa foi e le sui o le kamupani ua lagona e le kamupani le faanoanoa i le tala ua maua ma faamaise i aiga o ē ua aafia.

O loo galulue faatasi nei leoleo i NSW ma le Safework NSW e suesue le mafuaaga o le faalavelave.