A o malosi ai le pepesi o le fulu ma toe alu I luga tagata aafia i le Koviti, o le aso e faailoa mai ai e le malo se isi tala e tusa ma le faaaogā o ufi fofoga, faanofoesea ma tuipuipui.

O le faamaoniga lea mai le Palemia Jacinda Ardern a o talanoa ai mai Fiti ananafi, ma na ia ta’ua ai foi e lē o suia lava lana faamatalaga na tuuina mai i le lua vaiaso talu ai e lē foi Niu Sila i le moli lanu mūmū.

I le finagalo o le Palemia e lē tele se eseesega o le moli mūmū ma le lanu moli, na pau le eseesega o le fuainumera o tagata e mafai ona faatasitasi.

Ae mo le asō, o le a faalautele ai e le minisita o le Koviti Dr Ayesha Verrall faaopoopoga o ta’iala tāua e moomia le mulimulita’ia.

Ae i lipoti a le TV1 o loo vavalo ai suiga e ono maua fua rapid antigen tests ma faafaigofie ona maua ufi fofoga.