A o lalata ai le tauaofiaga o le fonotaga tele lona 28 a Malo Aufaatasi i mataupu tau le suiga o le tau ma le siosiomaga o loo ua faagasolo nei faatalanoaga a atunuu laiti tau atia’e le Alliance of Small Island States (A.O.S.I.S.).

O le A.O.S.I.S. o loo Taitaifono ai Samoa i le taimi nei ma o le faagasolo ai o ana faatalanoaga i mataupu e saunia ma tapena ai sui usufono lea na faailo ai e le Minisita o Siosiomaga Afioga Toeolesulusulu Cedric Schuster e pei ona faasalalauina ai vaega taitasi o lana saunoaga i upega tafailagi.

“E ao ina tatou amanaia le tulaga o iai nei faafitauli i suiga o le tau o loo tatou molimauina i aso uma.

“Ua lē utuva foi le tele o vaega ua aafia ai o tatou tagata, ua tele ina solo le palapala, ua mou atu le tele o figota mai o tatou ogasami, ua aafia foi amu ma o tatou tamaoaiga ma ona aafiaga.

“O le tele o aafiaga o loo lofia ai nei o tatou atunuu ua fai ma a tatou masani o le mea moni ua lē lava se taimi ma a tatou faia iai se gaioiga ua lē aogā lea.”

Ta’ua e Toeolesulusulu o le fonotaga o le a alo atu iai le C.O.P28 e ao lava ina tuuina atu se feau i le lalolagi ina ia faamalosia ma unaia ina ia taofia ai le toe faaaogāina o le suauu ae fautuaina ai le faaaogāina o malosiaga faafouina.

“E tatou te lē gafatia ona faia filifiliga mai lenei fonotaga e faaauauina pea ona faaaogā le suauu ae o loo tatou iloa lelei le tulaga o loo iai e pei ona iai lipoti mai le I.P.C.C. ma le I.E.A.”

O lipoti mai le Vaega o loo mataituina suiga o le tau poo le Intergovernmental Panel on Climate Change e ao ina tausisia le 1.5tikeri o le vevela i kasa mai falegaosi ona o le tulaga e faaleagaina ai le osone ma le siosiomaga.

O se tasi o mataupu na lāgā e le Minisita o loo iai lava le faafitauli o le faigata lea ona iai le avanoa i atumotu laiti ma nisi o atunuu tau atiae le tamaoaiga i tulaga i fesoasoani tau seleni aemaise o le tulaga i agavaa e mafai ai ona faatino auaunaga e faaaogāina ai malosiaga faafouina.

“E iai le faamoemoe o le a faatino i le fonotaga lenei o le a tuuina mai se fesoasoani atoatoa ina ia faigofie ona maua ai avanoa mo i latou o loo moomia.”

O le faaiuga o le masina o Novema e amatalia ai lenei fonotaga i Dubai ma o le a aofia ai atunuu uma o loo i lalo o le faamalu a Malo Aufaatasi mo le talanoaina o mataupu tāua tau suiga o le tau ma le siosiomaga.