I le motusia o le taamilosaga lakapi faavaomalo a le kalapu o le Malisi e le’i taunuu ona faia i le tausaga na te’a nei, ua talia e le malo le faaaogāina o le malae taalo o le Apia Park mo le toe faaauauina o lea taamilosaga i le masina o Iuni.
Ua faafetai ai le Pelesetene ma lea kalapu i le Palemia ma le faigāmalo ona o le lagolagoina o lo latou faamoemoe ma talia le avea o le taamilosaga o se tasi o polokalame o le faailogaina o le 64 tausaga o le malo tuto’atasi o Samoa i le masina lona 6 o lenei tausaga.
I le faalauiloaina o le taamilosaga lakapi ta’ito’afitu a le falegaosi ‘avamalosi o le Vailima ma le Malisi ua faailoa ai o le aso 5 ma le aso 6 o Iuni e faagasolo ai le taamilosaga.
E 60 afe tālā le tuuaofa’iga o faailogatupe ua tapena iai le kalapu taalo a le Malisi mo lana taamilosaga lakapi faavaomalo lea o le a maua e le ‘au siamupini le faailogatupe e 20 afe tālā i le vaega o alii, ae 5 afe tālā le manumālō o le ‘au siamupini i le vaega o ‘au a tama’ita’i.
O Ipu o le ‘au siamupini i le vaega o alii o le Tupua Fred Wetzell Cup ma le Cynthia Wetzell Cup mo le siamupini o ‘au a tama’ita’i.
O le a aofia ai foi ma le tausinioga i le Ipu a Muagututi’a George Meredith challenger’s cup mo ‘au a alii.
