A o loma le amata aloaia o le taitoafitu a Malisi Aukilani i le Aso Toonai 18 o Novema, na tatala aloaia le latou faamoemoe i le afiafi o le Aso Lulu 15, i le faamoemoe e aloaia ai le faafeiloai o ‘au uma o lea ua masii mai e tausinio i le taamilosaga i lenei tausaga.
O le faamoemoe lea sa maua ai le avanoa e valaaulia ai e le afioga i le peresetene a Malisi ia Lemalu Semo Sititi ma le asosi atoa a Malisi, le afioga i le Minisita o Faatoaga ma Faigafaiva ia Hon Laaulialemalietoa Leuatea Polataivao Fosi Schmidt e fai ma saunoaga autu o lenei tausaga a o tapena ai tama taaalo i taaloga.
O le afioga i le Minisita o se tasi o tama tuai o le aoga a Malisi.
Na tomua le saunoaga a le afioga ia Hon Laaulialemalietoa i lona agaga faafetai i le afioga i le peresetene o le asosi a Malisi faapea le mafutaga ona o le avanoa ua mafai ona valaaulia ai o ia e auai atu i se faamoemoe a Malisi i Aukilani nei ona o se taimi muamua lea ua auai ai ma lauga i le tatalaina o taaloga a Malisi.
O le isi vaega na afea i le faafetai a le Minisita ona o lea lava o loo ia maitauina le maopoopo o mafutaga a Malisi i atunuu i fafo, ma o le vaaiga foi lea o loo iai le mafutaga a Malisi i Samoa i soo se mea e fai, e vaaia lava le tumutumu o tagata e auai ona o le maopoopo ma lelei ona fuafua.
Na afea foi e le saunoaga le faafetai mo tama tuai uma a Malisi sa taaalo mo le Manu Samoa lea ua vaaia o loo faamaopoopo pea ia Malisi auā le manuia o alo o Samoa mo le luamanai.
O le taaloga ua tatau ona faatāua i le tagata, ma o le sogasoga ma le faamalosi ma lou tamaoaiga e tatau ai ona e ausia le mea o loo e naunau iai.
E leai se aogā pe a tusitusilima, e leai se aogā pe a feaina’i, e lē manuia pe a femisaa’i, ae tatau ona galulue faatasi ma maopoopo nei mea uma.
E iai le taimi e tauaimisa ai luga ae faaletonu atu ai le pito i lalo ma faaletonu ai ma tamaiti e ono omai e faalauiloa Samoa i taaloga.
O isi ia saunoaga a le Minisita i lana lauga faamalosi.
Ia galulue ma le onosai, aua le musuā ma faavaivai gofie e faamaopopo mea mo le manuia o Malisi ma le atunuu auā o loo sau taeao malama e taunuu ai i le taunuuga e ausia ai se faamoemoe maualuga e tatau ona maua.
Na taualuga le saunoaga a le Minisita i lana faamanuiaga mo ‘au uma sa auai faapea ma le mafutaga a Malisi ma lana toe tuualalo ia fai mea uma ma le fiafia ma le fealofani e pei ona masani ai.
Ia tali lelei malo ma ‘au taitasi ina ia toe foi fiafia ‘au taitasi ma se talaave.
Auā o le talaave e leai sona tau ae tauleleia.
O le maualuga foi o le faamoemoe lea a Malisi ona sa auai ma le Minisita lagolago ia Manuleleua Paletasala Talitau Tovale, sa agai mai e lagolago le ‘au masii mai a Vaimoso.
