Ua tali mai le Fofoga o le Fono i le tusi i le Faatonu a lē sa avea ma Palemia o le atunuu i tausaga ua mavae, Susuga Tuilaepa Sailele Malielegaoi i le nusipepa o le Samoa Observer.

O lea tusi a Tuilaepa o loo faapea mai le Fofoga Fetalai na te faaaloalogia le faaleo o le saolotoga o le tagata i manatu faaalia e aofia ai ma Faipule o le Maota, peitai o lafoga taufaifai o loo tuuina atu ona o le faia ai e lona ofisa o nusipepa o Faamatalaga e lē o se mea e tuuina ifo i lalo e le nofoa lea tulaga.

Ua faailoa e Papalii Li’o Ta’eu Masepa’u o loo tatou iai nei i le tulaga e ao ona silafia uma ai e le atunuu ni mea o loo faatulai mai i lea taimi i lea taimi ma e tāua ai le malamalama o le atunuu i mataupu o loo ave iai le faatāua a le atunuu.

Ua faaalia le faanoanoaga o le Fofoga Fetalai i le taitai o le Itu Agai ona o lona lē faaaloalogia o le galuega a le Fofoga Fetalai i le maota.

Ua manatu Papalii e lē afaina le lafoga ia te ia o loo umia le tofiga ae o le afaina o le nofoa ma le tulaga o le Fofoga Fetalai o se tulaga tofi na faatulai mai e le Faavae, o se tulaga e tatau ona faaaloalogia e soo se faipule lava o le maota.